Dosbarth Myfyrdod yn y Gymraeg – Welsh Meditation Class

Ydych chi wedi bod eisiau dysgu myfyrdod erioed, ond ddim yn siŵr ble i ddechrau? Neu efallai eich bod yn arfer ymarfer ond wedi colli eich cymhelliant?

Bydd y dosbarth myfyrdod misol hwn yn cael ei gyflwyno trwy gyfrwng y Gymraeg gan Jane Clapham, dysgwr sydd wedi byw yng Nghymru am y rhan fwyaf o’i hoes. Bydd Jane yn eich arwain trwy ymestyn ysgafn a thechnegau ymlacio i’ch paratoi i eistedd yn gyfforddus ar gyfer myfyrdod dan arweiniad 10-20 munud. Bydd y dosbarth hwn yn eich helpu i ryddhau straen a gorbryder, gwella ffocws, a rheoli gwrthdyniadau. Mae croeso i ddechreuwyr, yn ogystal â myfyrwyr mwy profiadol. Mae’r dosbarth yn gymysg – gallwch naill ai ymuno yn y cnawd yn y Ganolfan ger Bethesda, neu gallwch ymuno ar Zoom o gartref – bydd recordiad hefyd ar gael.

O.N. Mae’n ddrwg gen i fod y wefan yn y Saesneg yn unig ar hyn o bryd. Pan fyddwch yn archebu eich lle ar-lein, bydd angen i chi ddefnyddio’r Saesneg, ond bydd y dosbarth yn y Gymraeg.

• 🌀 Ar ôl y dosbarth myfyrdod, bydd Jane yn arwain sesiwn o Myfyrio â Gongiau o 7.00 – 8.15yh. Mae croeso i chi aros ymlaen a chymryd rhan yn y ddau ddigwyddiad am bris gostyngol arbennig.
• Os ydych chi’n chwilio am ryddhad o straen neu orbryder, bydd y sesiwn hon yn cynnig 75 munud o ymlacio dwfn gyda synau iachaol – gan gynnwys y gong Japaneaidd, clychau, powlenni pres, a mantrâu cysegredig. Bydd lleoedd ar gael yn y cnawd neu ar-lein, gyda recordiad ar gael am wythnos i’r rhai sy’n archebu.

Gwybodaeth am eich athro

Ganed Jane yn Swydd Buckingham a symudodd i Ogledd Sir Benfro yn blentyn. Dechreuodd fyfyrio yn ei harddegau a chafodd fanteision enfawr – felly dechreuodd hyfforddi fel athrawes ioga a myfyrio yn 19 oed. Heddiw, mae Jane yn rheolwr yng Nghanolfan Ioga Dru yn Nhy’n y Maes, Bethesda, ac mae’n frwd dros rannu manteision ioga, myfyrdod a sain gysegredig trwy ei sesiynau myfyrio â gongiau rheolaidd a’i dosbarthiadau myfyrio. Dysgodd Jane y Gymraeg yn 5 oed a mynychodd Ysgol y Preseli, Crymych, cyn symud i Ogledd Cymru i astudio Seicoleg ym Mhrifysgol Bangor. Mae hi’n ddysgwr Cymraeg brwdfrydig ac yn mwynhau siarad Cymraeg cymaint â phosib.

If you are a member of the Dru Professional Network you will accrue 1 CPD hour for attendance at this event. Attendees from other yoga schools will need to check individually for their own CPD credits.